Zogam sung Tedim, Tonzang le Kawlpi kikal khualzin mite in Bus sangin Motor Cyle kilimzat zaw ta ahih manin, Motor Cycle le Motor kiphutkhakna (Accident) tam semsem cih Tedim lam pan khualzinte' tung pan kiza hi. A diakdiak in Tedim gam le Tonzang gam khuaneu tuamtuam ah Motor Cycle kinei zihziah ta ci hi. Tua bang kawm kalah January 02,2013 ni-in Tedim pan Kawlpi lam zuan a ciahsuk Dyna Bus khat le Kawlpi lam pan Motor Cycle tawh a ciahto Tedim gamhuam Buan khuami Tg. Zam Suan Mung (Kum 19) pen Taingen- Hiangzing khuakiang Coffee kiciinna Lamkawi tengah nasiatak kiphukha uh a, Dyna Bus in Motor Cycle tuangpa' lutang gawi kha ahih manin, a lutang om nawnlo phial cih thu kiza hi. A phukha Dyna Bus in taisan pah bek tham loin a Motor number zong kithei zo nailo ci hi. Kawlpi lam pan Palikte in a zak phetin delhto pah uh ci hi.
Tuahsiatna tungtang ah khualzin mite khempeuh in kimulkim ciat ahih manin, Siatvehna sum kipia ziahziah ci-in, Tonzang lam zuanna a ciahto Rev. Thang Khan Khai (ZBA Pastor) tung pan kizasawn hi. Tua banah misipa pen a numin Nu Vung Khaw Neem hi-in, a pa in sihsan khin ta ci hi. Dyna Bus neite le motor hawlpa (Driver) te tawh misite kikal bangci thukisuah ding cih kigenthei nailo ci hi. Tua hi in, Zogam khuaneu tuamtuam ah Pasian thupha mah i ci diam Motor Cycle tam lua mahmah ta ahih manin, Motor Cye hawlzia le Lukhu khuk den ding thupi mahmah cih kiza hi. Hong nusia Tg. Zam Suan Mung i nusiat innkuanpihte Tongsan Media pan Dahpihna i puak hi.
Source : Rev. Khakhai (Tongsan Agent, Kawlpi)
No comments:
Post a Comment