Malaysia ngam aom Zomite' ing hamfatna & USA Zomite' inga thu hoih

Help College ki hong kik ta:

UNHCR leh Help College te’ vaihawmna’ ah Sang akah nuam alunggulhte’n November 23 ma-in, na min sazian ZAM zumah ong puak hamtang un. Akisam ding thute: 1. Na min. 2. UNHCR Number. 3. Kum 15 pan 24 kakal sung hiding. Theihding: hih sang akah nuamte pen UNHCR card tawisa hi hamtang ding hi.

US Kumpi phalna tawh Oregon State, Portland High School te’ah Zolai kisin thei tading hi:

Portland High School te’ah Zolai zong Second  Language khatin hong kisangthei ahih manin, I biak Pasian tungah lungdam i ko masa hi. A masa penin Centennial High School ah kipan ding hi.

Saturday, November 17th, 2012, 7:30am pan 12Noon dong Zolai test Centennial High School, Cafeteria ah Zomi leh Zolai alunglut High School sangnaupang tengin neiding uhhi. Centennial High School Zomi leh alunglut sangnaupang khempeuh in Registration form ngahciat khinding uhhi. Tua form pen November 9^th, 2012 Friday ma-in $8 tawh Book Keeper office ah apding hi.

Full Credit pen credit 4 ciang kipia dinghi. Middle School 8th graders tenzong tua test hong neithei      dinghi. High School a tun ma-in High School Credit 4 ngahtheiding uhhi. Portland, OR High School   Diploma ngah nadingpen kum khat ciang credit 7 tawh kum 4 sung ih sinciang-in credit 26 kingaha Diploma kilathei panhi. Zolai test tawh Credit 4 ngahthei ding cihpen thupi mahmah hi. High School kum lang   sinsang' hong tamzaw hi. Sang naupang te' adingin zongh lungluthuai mahmah hi.

Tua khitciang Portland Zomi te’ sangkahna High School leh College atuamtuam te-ah zong Zolai sintheihnading ki vaihawm toto dinghi. Tua banah Zomi omna State tuamtuamte’ah zong ih vanzawh nading ki hanciam dinghi. Mai lamah ih biak Pasian in lam honglak toto dinga, Zomite’  Burmese leh Chin hong kici nawnlo  dinghi. Ih  pantheihna ciatpan hanciamin mapangkawm ni. Hih bangin hongpiantheih nading “Gualbaan Zolai Sinbu” hong bawlkhia Pu T. Zokhai, Australia ii Zomi veina leh deihsakna tungah lungdamna lian mahmah hi.

Lum L. Thang

Khai Pian

Pau L. Khup

Zomi Education and Culture Development

ZAUSA