Abeisa Kawlgam galkap kumpi khut sung pan gentheih haksatna hangin Kawlgam le Thailand gamgi a om Maela galtaite phual (Refugee Camp) pansan Zomite in gam le minam itna/ kepcing nopna tawh Zomi Association of Thailand (ZAT) cih kipawlna khat phuankhia uh a, zum inn thak (ZAT Office) honna le Zomi Khuado Pawi 2012 tawh gawmin October 27,2012 ni ( Thailand Time 8:00 AM) hunin Maela Camp sungah thupitak nei uh cih kiza hi.
Tua lai ah Pu Zomi Paul Cin Lam Pau (ZAT President), Daw Naw Di Di Phaw (Maela Camp Committee), Pu Thang Khan Lian le Rev Kam te in ZAT Office hona ( Khau atsatna) nei uh hi. Pu Thang Khan Lian in Zomite tangthu tomkim pulakkhiatna nei-in, Pa Dal Khan Suan (ZT Secretary) in ZAT Statement simkhiatna nei uh hi. Tua banah Maela Camp ah thunei makaipite le sanggam Karen Kipawlna (KNU) pan makaite zong tampi mah kihelthei cih kiza hi. Zomi ngeina Khuado pawi tawh kigawm ahih bang mahin Thangho le Liando te Unau i Khuado late le Pu Chin Sian Thang ( Chairman of ZCD) i laphuah minam itna Zola ngumngek te zai ziahziah uh mipi 100 val kihelthei cih kiza hi.
Hih ZAT Office honna le Zongeina Khuado pawi 2012 bawl zawhna dingin mun tuamtuam a om Zomi Association kipawlnate ahi ZAM, ZA Japan, ZAUSA, ZA Australia cihte le mimal pawl khatin minam itna tawh mapanpih uh cihthu Pu Zomi Paul Pau tung pan kiza hi. Hih Zomi Kipawlna (Zomi Association) pen Thailand bek hi loin, leitung gam tuamtuam ah kiphuankhia khin banah, a omnai lohna gamte ah zong kiphuan kawikawi lai ding cih hanciamna kinei cih kiza hi. Hih Zomi Association tungtawn in UNHCR,UNO akipan leitung gam tuamtuamte in Zomite a theihlawhna min khat ahihna kiza hi.
Video Link :
Reported by : Pu Zomi Paul Pau ( ZAT President), Thailand
No comments:
Post a Comment