Kawlngam kikapna ah mi 3 si, mi 6 liam cih KIA in soikheh

Kawlngam sungah Kachin te leh Kawl ngalkapte ki kakaplai uha, tuni January 14, 2013 Monday ni kikapna panin khua sungmi 3 si-in, mi 6 liam cih Kachin Rebels te'n AFP Newste' kiangah soi uhhi.

Kachin Independence Army (KIA) te' Headquarters omna ahi Laiza ah Kawl ngalkap te'n thaupi tawh vei 3 na akikapna hangin asi aliam aom ahih lamzong KIA Spokeman Colonel James Lum Dau in soikheh hi. Laiza ah Direct in ongkap uh pen tutung avei khatna hi cihzong pulakbeh hi.

Kawlngam kumpi te'n thaupi tawh zingsanglam akapna panin naupang kum 15 afapan khat leh putek kum 76 aphakhin khat si cihi. Khuasung mipit'e omna ngei-ah Kawlngalkap te'n thaupi nakhiat suksong uh ahih manin, asi aliamte banah khuasung mite zong patau gawp in akap tawh, a awng tawh ki sehsangngawp uh cihi.

Aliam mi 6 te lakah naupangno zong 2 kihela, aliamteng sempoh Laiza Hospital ah puanza ciangtawn tawh kinawnsuk uhhi.

Hih thaupi zatna vai tawh kisai Myanmar Presidential Spokesman Ye Htut in aimah Information(zaksakna) ngahlo hing, ka seihpih kha ou ci'n AFPte' kiangah soikheha, Kawl ngalkapte'n mipi Civilians te' a ngiim tektek hilo hi ci'n soikheh hi.

"Khuasung mipite' koilam ah om cihpen ko seihpihlo hi ung. Khuasung mipite' ngiimin kikap hetlo inghi cihpen kong telsoisei hi" ci'n Ye Htut in AFP Newste' donleh hi. 

Kachin ngam panin khuasung mipite' ngampua ah ngaltai khehing cilelah akinai pepen China (Sen) tebek hi-a, Chinate'n zong Kachinte' pen na deih khollo uhhi. Ningkum sungin zong China te'n angamsung ah ngambelin aom Kawlngam Refugeete' ong lehhawlleh uhhi. 

Source: ZomiDaily