India gamsung ah miginalo pasal honkhat in abuangawpna hangin asihlawhliang ahi kum 23 bek aphapan numeino mintaktak pen ki pulak khiata hi. Amin pen "Jyoti Singh Pandey" ahihi.
Kum 53 aphakhin apa Brave dad Badri ii genkhiatna ah leitung in ka tanu mintaktak ong theihpih henla, hihbang in miginalo te buangawp athuak numei te'n khanlawhna leh thalakna in neitahen ci'n amintaktak a pulakkhia ahihi.
Ka tanu pen khialna, mawhna bawl in asi hilo a, amahleh amah apumpi akidalna hangin asi ahih manin kakipak hi cihzong genkhia hi.
Hong nusiakhin ahi Jyoti Singh Pandey pen "India’s Daughter" ci'n zong pahtawina min kipia a, leitung gamtuamtuam paninzong ki thukimpih ngeingai hi.
Tuaban ah apa inzong hihzah in bawlsiat athuak ka tanu min amanthanloh nadingin "Jyoti Singh Pandey" cihmin tawh zato Hospital khat aki lamding ka lunggulh ci'n genkhia hi.
Hong nusia Jyoti Singh Pandey te teenna khuapen Uttar Pradesh State sung aom khuaneu khuata khat hi a, khuasung ah cidamna tawh kisai Hospital, Clinic cihte omlo cihi. Tua ahih manin amahpen Siavuan Doctor asuaknuam hi a, khuapih tuipih te adingin nahoih sepding alunggulh khatzong ahihi. Tuaban ah aomna a inn uh enleng amau innkuan ii nuntakzia, sumlepai hamsatzia dingpen ki ngaihsutpih thei a, nulepa in amitsuan mahmah leh a lamet mahmah uh ahi Jyoti Singh Pandey in hongnutsiat ciangin innkuan sungah khakham veilawhgawp uhhi.
Jyoti Singh Pandey te inn
Ka tanu pen Doctor asuaknuam mahmahkhat ahih manin, amah Doctor asuahtheih nawnlohhang mite noptuamna apiathei Hospital khat ka tanu mintawh kilam tahen! Tua hileh ka lungdam mahmah dinghi ci'n apa Brave dad Badri in genkhia hi. Source:ZomiDaily
No comments:
Post a Comment