Bangalore Zomite' thungetna tawh fawk tektawng

Bangalore Railway Station

India gam Assam State sung a om minam khat ahi Bodo minamte leh Bangladesh gam pan alut Muslimte kikal ah abeisa hun khat lai akipan minam vai buaina hangin, India gam sung khuapi tuamtuam a om Muslim te'n India nisuahna leilu lam (North East) ateng mite tungah thahna le buaina bawl sawm uh cih kiza hi.

Thuthang kizakna ah Muslimte' biakna Antan pawi Ramajan khit ciangin Bangalore khuapi sung a om North East minam 60000 kimte pen Muslimte in thahsawm /buaisak ding cih thu kiza hi. Tulaitak in Bangalore khuapi sungah nasem le pilna sin Zomite akipan North East minam a tul asim in om uh a, lauthawng pipi a om sangin inn le gam lamah Railway Ministry in North East mite ciahna ding Special Train nih vaihawmsak uh ci hi.

 Bangalore City Police Commissioner, BG Jyothiprakash Mirji in agenna ah, thuman lo mi pawlkhat in text message leh social networking site tungtawn in thehzaak uh ahihna gen hi. North East mi a ciahna ding a tamzaw pen Assam mite vive hi uh a, Waiting list ticket bekbek 5600 kila ta ci hi. Mr. Biren Baishya (member of parliament) in Train bek hi loin a cing ding (security) zong piak huai hi ci-in, Hindustan times ah gen hi.

A hi zongin State Home Minister R. Ashoka in Train Station ah pai ngiat in North East mite ciah lo dingin akhoh hangin,lau uh ahih manin 3000 val bang ciah khin ta hi. Mr. Baishya in nilai ni in Union Home Secretary RK Singh kimuhpih in north east te lungmuanna ding ngaihsut dingin ngen hi. August 15,2012 nitak in India Prime Minister Manmohan Singh leh  Home Minister Sushilkumar Shinde ten Karnataka Chief Minister Jagadish Shettar kiangah North east mite lungmuang sak dingin thupia hi.

Karnataka DGP Pu Lalrokhuma Pachuau (Mizo) pen North East mi hi-in, police te tungah bang mah mawhsakna/ hawmthawhna om lo ci in gen hi. Tua banah Bangalore khua sunga NE mite omna munte Police ten limtak cing uh hi. Pu Lalrokhuma Pachuah in agenna ah, "hih thu tawh kisai thu phuahtawm tampi ging mah le tuate um kei un la, lungmuang takin om lel un" ci-in North East mite kha muan ci hi. Bangalore khuapi sungah North East mi 2.5 lakhs vaal om uh a, atamzaw pen sangnaupang vive ahi uh hi. Hih Banglore khuapi sungah Zomi tampi om uh ahih manin, lauhuaina pan i biak Pasian in a kepna ding thungetna tawh mapang ciat ding hi hang.

 

Source: Tongsan