Tedim Lai leh Pau Khantoh Thu:

Revd. Khup Za Go (L)

1964 kumin Rev. Marrison in A Report on Bible Translation in North East India kici a gelhna sungah Tedim pau Manipur gamah a kizang kampau khat hi cih thu laimai 60 naah a gelh hi. Dr. Marrison, Linguistic Consultant, BFBS, London-ah a sem kimlai tawlkhat sung North East India kampau thu a kan dingin Linguistic Adviser, Bible Society of India & Ceylon min tawh Shillong ah 1964 kumin hong om a, tua sung teng ama muhna bang report laibuin a bawl hi. Laimai 101 ah The languages of the Manipur a cihna gamlim Manipur State sungah Tedim pau zong a tuangsak hi.

1965 kumin Prof. Henderson in 1954 kuma Zogam ah a paina pan a theihna bangin Tiddim Chin kici laibu laimai 172 a pha Oxford University Press ah khensak a, London Oriental Series Volume 15 ciin a kiciamteh hi. Hih laibu pen Mikang gam bekah hi loin, India leh Kawlgam library tuamtuamah kingah kawikawi a, Bible Society of India, Bangalore ah zong a nei uh hi. Prof. Henderson puanlom Falam leh Tedim kikalah mangsak kha uh ahih manin Hakha leh Falam gam kampau thu a kansa teng mansuah khin a, Tedim a tun ciangin Tedim pau thu a gelh kik pat ahi hi.

1984 kuma London ah ka pai laiin nihvei tak ama innah ka tung hi. Ama thusiamna tawh School of Oriental and African Studies, British Museum Library, BFBS Library teah Zogam, Zomi, Zolai leh Lai Siangtho teina tangthute limtakin ka en khin thei hi.

Zogamah hong pai laia a kikholhpih Mr. Shiah Lwe, Mr. Lian Cin Thang, Mr. Sum Mang, Rev. S.T. Hau Go, Mr. Vul Za Thang cihte leh tua hun laia Zo Vuanzi (Minister for Chin Affairs) Mr. Za Hre Lian te min a gen ziahziah thei lai hi. Prof. Luce in Zogamah a paina pana a gelh Common Form in Burma Chin Langguage? kici Thahdo, Tedim, Hualngo (Lusei), Khualsim, Haka (Lai), Asho leh Khumi paute a etkakna khutgelh laibupi zong tawlkhat ka et dingin hong kemsak hi.

Prof. Henderson kiangah khatvei, ko Tedimte in Kawlpau tam kawm lua hi ve ung aw, gentehna in nai cih khawng? ka cih khak zenzen leh, aman nai pen Kawlpau hi tuan lopi, Kawlte in Pali kammal a zuih uh hi zaw hi? hong cihsan ziau ciangin ka dai pah khian hi.

Sawtpi pan Bwe Karen Democracy a bawl sawm hi napiin, tua pen taksuah zo loin Tedim pau laibu hong bawlkhiat zawsop pen a lamdang khat hi. 1967 kumin Bible Society of Burma in Thuciam Thak leh Late kigawm a khet ciangin a tuamna sung lamah The New Tastement & Psalms in Tiddim Chin kici ta a, Kamhau cih a tuang zel pen kizang nawn lo hi. Hih Thuciam Thak leh Late kigawm Zangkong a kikhen pen Bible Society of India vaihawmna tawh India ah zong kingah thei hi.

1969 kumin India gam Tedim mite zat dingin Christian Literature Centre, Gauhati in Tedim Labu 1,000 a khen hi. U Maung U, Executive Secretary, Burma Baptist Board of Publication, Rangoon, thukimna tawh a kikhen hi a, a sungah ?India gama om Tiddim Chinte aa ding cih thu tuang hi. Hih kum mahin Tedim Labu Tonic Solfa tawh kibawl a masapen Kawlgamah kikhen hi.

Tua pen 1974 kumin Kawlgam mahah 4000 kikhen a, 1979 kumin India gamah bu 8,000 kikhen a, 1986 kumin bu 10,000 kikhen kik hi. Tua pen 1988 kum ciangin lei ding om nawn lo hi. 1969 kum mahin Manipur gamah Tiddim Chin Cultural Club kiphuan a, India kumpi in Cultural Hall leh Printing Press pia hi.

1970 April khain Manipur gamah Sia Nok Swan Lian in khasim thukizakna Tangko khen a, Kawlgam pua-ah Tedim pau tawh thukizakna a kikhen masa khat hi. 1970 August khain Manipur gama Tiddim Chin Union makaite in Sia Nok Swan Lian leh Sia Khup Za Go New Delhi ah paisak uh a, Tedim minam, lai leh pau tawh kisai tua hun laia Prime Minister a sem Mrs. Indira Gandhi leh ulian tuamtuamte tungah lai va khia uh hi. Hih banga a pai laiun Mr. S.C Jamir in nakpiin a huh hi. Tua banga a paina thu uh Culcutta pan a kikhen Mikanglai thukizakna Hindustan Standard August 8 niin a suak hi. ?

Tedim mite pen kampau, ngeina leh tatzia tuam khat a nei minam, India leh Kawlgam kigina tengah a teng Zomi nam ahi uh hi. 1937 kuma India leh Kawlgam a kikhen ciangin Tedimmite a tamzaw Kawlgam lamah kikoih a, a tawmzaw deuh india gam sungah a om suak uh a, Manipur leh Mizogam sungah a tam diak uh hi. Mihing 1,00,000 nuaisiah a pha lo ding Tedim pau pen Kawlgamah suahtakna a kingah ma ahi zongin, suahtakna a kingah zawh ciang ahi zongin kumpi Sang (School)ah a kizang khat ahi hi? ciin gen hi.

New Delhi pan a kikhen Orbit Weekly ah August 16 niin New Delhi ah Tiddim Chin Union makaite paina thu mah a man tawh a suaksak uh hi. Japan gal laia leitung bupah min a nei Tedim mite pen suahtakna ngah zawh ciangin India gamah kidawk zo nawn lo, a kidawk ding zong a haza mi a om tawntung hangin Manipur gam Tiddim Chin Union makaite hangin damdamin hong kidawkkik hiaihiai uh hi.

1972 kuma United Bible Societies in New York pan a khet uh A Book of a Thousand Tongues kici laibupi laimai 226 sungah ?Ni danglaia Kam Hau? pau a kici thei zel Tedim pau pen Tedim Political Subdivision sungah tangkam (lingua- franca) ahi hi… India gam Manipur gamah zong Tedim nimante om uh hi?ciin a kiciamteh hi.

1975 kumin Manipur gam Lamka gamah Tedim Chin Vernacular Golden Jubilee kici pawi nasia takin kibawl a, Mr. Holkhomang Haokip, Minister of State (Education), Govt. of Manipur, Chief Guest ahi hi. 1925 kumin Zogamah New Education Policy a kizat ciangin Kawllai teng kiphiatin Zolai tawh lai kisim pat kum ahih manin, tua zawh kum sawmnga cinna pawi a kibawl hi. Golden Jubilee Souvenir kikhen a, Tedim lai khantohna dinga a hahkat phadiak Rev. J. H Cope, Sia J. Gin Za Twang leh Rev. Kam Khaw Thangte pahtawina Puanlaisan khat ciat kipia hi.

1976 May 19 niin Rev. C. Arangaden,Associate General Secretary (Translations), Bible Society of India, Bangalore in Manipur gam Zomite sungah Tedim pau pen tangkam (lingua franca) damdamin a hong hih ding a upmawhna thu a gen hi. Hih kum mahin Chin Baptist Association, Manipur in Tedim pau thukizakna Lungdamna Aw kici pana, tu dongin kawlgam Vaigam mun tuamtuamah kihawm kawikawi hi.

1977 June 12 niin Chin Baptist Association phualpi Tangnuam Christian Centre ah Tedim Lai Siangtho a kikhet cilna kihawmkhia hi. Mr. L. B Thanga, IAS, Chief Secretary, Govt. of Manipur in BSI Executive Council Member a hihna tawh laibu khahkhia a, Rev. D.D Pradhan, Bishop of Church of North India in President, BSI Auxiliary, Shillong a hihna tawh hunpi a zang hi.

Chin Hills ah a kizang kampau lak panin Lai Siangtho buppi a kikhen masapen ahi hih Tedim Lai Siangtho pen 3500 kikhen a, Thuciam Thak teng a tuamin bu 3500 mah kikhensak hi. Hih bu pen Burma Bible Society hiam, Bible Society of india hiam in a khet uh hi loin, leitung bup Lai Siangtho nasep kipawlna United Bible Societies (UBS) in a khet ahih manin North East India ah UBS in a khet Lai Siangtho pen tu dongin hih Tedim Lai Siangtho bek mah hi lai ahih manin a lamdang khat hi.

1979 kuma kipan Tahan Tuiphum Pawlpi in khasim thukizakna Awging kici khen a, tu dongin a kizom to lai hi. 1980 kumin Zomi Christian Literature Society (ZCLS) kici Kawlgamah kiphuan a, Kalaymyo ah phualpi a nei hi. Tedim pau leh lai tawh kisai ZCLS pen inntekpi hi a, Nipi sang laisim bu, Labu leh Lai Siangtho tei leh khet nasepin nei pah hi.

1981 kuma kipanin Tonzang Township Baptist Association in TTBA Tangko kici kha nih sim thukizakna pan a, tu dongin kikhen lai hi.

1982 october 12 niin 1932 kuma kikhen Thuciam Thak a kiteipha leh Thuciam Lui teng a kigawma Tedim gam mi mahmah in a kizawhna lungdamna pawi leh Thuciam Thak a kineih zawh kum sawmnga cinna pawi a kigawmin TBA makaihna tawh Tedim khua ah kibawl a, mihing 8000 in ankuang um uh hi ciin kiciamteh hi.

1983 ciangin hih a tunga kigen Thuciam Lui leh Thuciam Thak bu kigawm ?Pulpit Lai Siangtho kikhen a, tua bu mah Bible Society of India in bu 10,000 thakhatin khen a, ahih hangin 1987 ciangin lei ding kimu zo nawn lo hi.

1985 kumin Assam gam Guwahati khuapi panin Zo Aw kici kha thum hal magazine kikhen a, 1987 dong a kikhen hi. India khuapi khat pana Tedim pau magazine a kikhenmasa pen hi.

1986 March kha in Kalaymyo Zomi Baptist Association minin kha thum thukizakna Pengkul kihawmkhia a, tu dongin pha takin kikhen lai hi.

1987 kumin Pune khuapi panin sangnaupangte hanciamna tawh Zomi – Chin Sangnaupang Magazine kici khen uh a, Shillong panin sangnaupangte leh galkapte hanciamna tawh Zo Lengthe magazine kikhen a, tua kummahin Lamka panin Chin Students Association makaihna tawh Zoheisa kikhen a,tua zawh ciangin zong khen kik zo uh hi. Hih hun ma leh hih hun sawng teng mahin Kawlgam leh India panin Tedim pau tawh kheset ah la kikhum – biakna la leh gam-le-lei itna la tampi tak mah hong kihawm hi.

Tua bang danin hih hun pawla kipanin khangnote sungah minam itna, lai leh pau puah nopna hong khangin Kawlgam Vaigam ah khanlawhna lianpi khat hong tung hi. Hih hun pawl mahin magazine leh kheset la bek hi loin Zomite in video nangawn hong bawlkhia a, ?Melmuhtongsan? kicilawh liangin, Tuibuasa kiluak kik thei lo, Thuammual pan itna, ?Na pal lo lah tang cihte hong kibawl a, Lamka gam mun tuamtuamah kilak kawikawi hi. Hih hun pen Tedim pau tawh video a kibawl pat hun ciin kiciamteh ding hi.

1988 kumin Zogamah Amerikan Baptist Misonari a sem nunung penpa Rev. Robert G Johnson in laimai 1320 a pha laibu a bawlna sungah Zogamah misonarite leh pawlpi makaite in a beisa huna lailam a sepna tangthute a kicing takin kikhum hi.

Hih kum lian mahin Summer Institute of Linguistics, Inc. (USA) in leitung bupa kampau 6170 a kiciamtehna laibupi Ethnoloque kici a khet uh, kawlgam sung kampaute tawh kisai a kigenna laimai 439 sungah : United Bibles Societies in 1984 kuma a tuatna panin Tedim kampau a zang mi 1,00,000 pha ding hi cih thu leh Tedim pau Tedim subdivisionah tang-kam (lingua franca) ahi hi, cih thu tuang hi. Tua laibu mahah India gam kam pau thu a kigenna laimai 466 sungah : United Bible Societies in a tuatna panin Tedim minam mihing 1,00,000 pha ding hi, cih thu a gen zawh ciangin Tedim pau pen tang kam (lingua franca) ahi hi cih thu mah a gen kik hi. India leh Kawlgam sungah a om Tedim minam teng kigawm taktak leh 1,00,000 sangin tamzaw tham dingin thukan mite khempeuh in a ngaihsun uh hi. Ahi zongin hih Summer Institute of Linguistics te in hong phawksak kik uh bang hiam cih leh, 1912 March 30 hun lai pek pana Rev. Sharrett in Kawlgampan BFBS, London tungah kampau thu tawh kisai, a muhna leh a ngaihsutna a puakna ah Zogamah Tedim gam bek panin tang kam (lingua franca) a pian theih ding lamethuai hi,a cih leh Falam leh Haka pau pen kawlgam bekah kizang a, Tedim pau pen a hih leh, Kawlgam leh India ah kizang khawm hi.

Lai leh pau pen mihingte, ganhingte mah bangin i puah zawh, i zun zawh a, i kikholhpih mun leh maingal a, tektang a, zual zo pan a, i puah kei a, i zun kei a, i thupisim kei leh, ki pah, zin tang pahin maitaang zo lo pah hi, mipilte in ci uh hi. Tua ahih manin Tedim lai leh pau zong Kawlgam, Vaigam leh mun khempeuhah a zual nading, a maingal nading, a tualtel nading, a teektan nading leh a maitai nadingin lai lam nasemte, la phuak siamte, la sak siamte, leh thuhilh siamte khempeuh in laibu a kipan thukizakna, kheset, radio, video leh TV dongah nasia taka i zat zawh nadingin takkheh?ciin hanciam pha san ni.

(Source : Tedim Pau leh Lai Khantoh Thu, pp 13-24)

Ref: vaphual.net