Japan ngam Tsunami khauh mamah in March 11, 2011 ni'n nawk leh!

South East Asia, Japan gam Tokyo khuapi pan nisuahna leilu lam Km.400 (250 miles) agamlatna Miyagi le Fukushima khuapi tengah tuni March 11,2011(Japan 2:46 Pm) hunin ( 8.9 Richer Scale) tha tawh zinling khauhpai mahmah in, Pi-33' (10mm) sang in Tsunami tuihualpi kihual a, Mi 400 val sikhin ta in 20 val aliam kithei panin atawm pen 200-300 kikal Tuipi sung le mun tuamtum pan kimukhia thei lai dingin thukizaknate in gen uh hi.

Hih Tsunami tuihualpi pen Pacific Ocean akipan North and South America gam banah Japan, Russia, Marcus Island leh Northern Marianas te ah kizom thei ding ci hi. Tua banah Guam, China's Taiwan, the Philippines, Indonesia leh U.S. state of Hawaii te ciang dongah kilawh/ kizom kha thei dingin zinlinna lam sai mipilte in pulak uh hi. A diakdiak in Japan gam tuipi khuapite ah khauhpai phadiak in kizopna Telephone, Internet akipan Motor, meileng, tembaw kizopna tuamtuam kisia mang hi. Thukizakna danah Tokyo khuapi le a naihuam khuapi tuamtuam ah inn 4 millions val electrit mei kisiacip ci in Japan gam mei lam saite in gen uh hi.

Inn le lo, Motor , Tembaw akipan van tampi kisia in tuipi-in paipih mang hi. Hih Tsunami pen Japan gam adingin abeisa kum 140 sungah akhauhpai pen leh a lauhuai pen dingin Japan Media lam vaisaite in gen hi. Tokyo Airport pawlkhat Tsunami tuihual naui ah mangcip in pawlkhat kikhak ta hi. Meileng, motor kizopna kisiatna hangin zum nasemte inn ciah thei loin, a om omna mun uh ah giak phot uh ci hi.

Source By - BBC & CNN & Pu Nang Lian Thang (Japan)

Japan a om Nu Haukhek in agenna ah;

"2011 kum March 11 ni nitak lam Japan hun 2:45pm pan kipan in ziin liing ziahziah hi. Tawm khat khawl zel in, liing kik pahpah hi. Tu laitak nai 2:59 hun inzong liing ziahziah lai hi. Inn sung aa van om khempeuh puuk ziahziah in, a pua ah bangci ding cih ki en ngam lo hi. Nisuah na lam gam dung suk ah Tsunami khauhpai mahmah ding ci'n, TV in warning pia lai hi. TV ah mei kaang khawng zong meikhu ngiainguai khawng zong lak uh hi. A kipat na bel Richter scale 7 pan khawng hi leh kilawm hi. Thungetna ah hong phawkpih ta un."

By : Nu Haukhek (Man Ngaih Hau), Tokyo, Japan