Yangon khuapi sungaom, Hotel thupi 3 te' IGE company tungah ki-ap!

Strand Hotel

Yangon khuapi sungaom Tamada Hotel, Inya Lake Hotel leh Strand Hotel pi 3 te' No. 1, Industrial vuangyi U Aung Taung tapa U Nay Aung hi neih IGE company tungah ngalkap kumpite'n ap khin hi cih thukiza hi. Hi IGE company pen tuma sa 3 lai kiima, akifuan kheh Hotel and Tourism vuangyi te ii falna nuai pan akawm uh nasep khat hi cih vuangyi ulian te' tawh kinai te' khat in soi hi. Tu ahih manin, hi hotel pi 3 sungaom zum khan tuatuamte' zong amanlanga akihepnang uh thupia hi ci hi. U Nay Aung pa' pen Bogyoke mugyi Than Shwe hi mi muan khat ahihna hang hi zong kici a, mi atamzaw hi soi na ah a u pa Bomu Pyay Aung pen Bogyoke mugyi-junior Maung Aye tanu Daw Nandar Aye hi pasal zong hi kici lai hi. 

U Nay Aung in Aung Yi Phyo, IGE, MRT, United Ahmayah kici min tuatuam vawhin, Kham tawhna, Namngim tuilakna, Leisung Gas nam tuatuam te' lakna, Sing nasepna, Bank nasepna cihte' banah  No.(2) Electronic wire khau lianpi te' zatna ah, lei zuakna cihte' sem hi. Tamada Hotel pen 3 star hotel cih leh mitampi seih Scott Market (Bogyoke Aung San Market) leh Yangon Rail way Station cihte' pen Sule Pagoda tawh kinai aom vive ahi hi. Inya Lake Hotel pen 4 star hotel ciaptehna ngaha, Strand Hotel pen 1901 kuma, Mangkang (Colony) hunlai akilam hia, kum 100 aval khin leh tulaitak Kawl ngam sungah 5 star Hotel khata kiciamteh hi. Tulo adang Hotel 28 bang Yangon khuapi sungah om napi in, 1996 Visit Myanmar Year ci-in, honguha, ngalkap kumpite' lametzah leh upmawhzahin, ngamdang khualzin mi ongtam zolo a, angaihsutzah uh aimah USD ngahlo ahih manin, hibangin, amau sunga Company Limited tuatuam tungah ki-ap hizaw hi.